Uboshiwe ‘obekhipha imali’ ngamakhadi akwa-Sassa

Ulale ebaliwe umlisa osolwa ngokubanjwa oqotsheni ngabakwaSidlodlo ekhipha imali kwi-ATM ngamakhadi akwa-South African Social Security Agency (Sassa), nokuyisikhungo esisingethe izibonelelo zikahulumeni (grant).

Amaphoyisa ophiko lwe-Umlazi K9 Unit abevele ezingela lo msolwa emva kokulunywa indlebe ngezenzo zokukhwabanisa ebezenzeka eManzimtoti.

Ngenkathi efika kule ndawo athi abhadame umsolwa , oneminyaka engama-25 ubudala, eduze ne-ATM, ekhipha imali.

Kuthiwa ubephethe amakhadi angama-36 akwa-Sassa kanti nama-pin code abebhalwe kuwona amakhadi.

Ube eseboshwa maqede wayovalelwa esiteshini samaphoyisa khona eManzimtoti. Uzobekwa amacala okukhwabanisa kanye nokuphula umthetho we-Electronic Communication and Transaction Act.

uKhomishana wamaphoyisa osabambile, u-Major General Bhekinkosi Langa, uthi amaphoyisa asazophenya ukuthi umsolwa uwathole kuphi futhi kanjani la makhadi akwa-Sassa.

views@liveexpress.co.za

news@liveexpress.co.za

Image: SAPS

Related Posts