Baboshiwe ‘abagwinye’ i-cocaine e-airport

Abalisa ababili bakhalelwe amasango kaSigonyela ngezinsolo zokuthi batholakale begwinye inqwaba yezidakamizwa zohlobo lwe-cocaine, nabebehlose ukungena nazo kuleli, esikhumulweni sezindiza, i-OR Tambo International Airport, e-Gauteng.

Ngokombiko wabakwa-South African Revenue Service (SARS,) laba ababili baboshwe beqeda kwehlika endizeni ebivela edolobheni i-Sao Paulo, kwelase-Brazil.

“La bagibeli bamisiwe, njengoba oyedwa wabo ebesehlonzwe njengomuntu okungenzeka ukuthi ugwinye izidakamizwa,” kusho abakwa SARS bengenza nangokuthi umsolwa wesibili yena ukhombise izenzo ezisolisayo.

Babe sebeyiswa esibhedlela ukuze bahlolwe ingaphakathi (X-rays) nalapho kube sekutholakala khona ukuthi umgibeli wokuqala ubemumethe okuqukethe izidikamizwa okungama-58 esiswini sakhe ngenkathi omunye yena ebemumethe okungama-41 esiswini.

Zilinganiselwa ku-1.4 kg, ngokwesisindo, izidakamizwa okutholakale ukuthi bezigwinywe yilaba balisa.

Laba babe sebeboshwa maqede baqashwa ngeso lokhozi ukuze bakhiphe lezi zidakamizwa ababezigwinyile.

views@liveexpress.co.za

news@liveexpress.co.za

Image: Wikipedia.org

 

Related Posts