IHhovisi likaMengameli lithi ‘siphoxile’ isinqumo senkantolo ngolwama-spy tapes

IHhovisi likaMengameli selibhodlile kulandela isinqumo se-Supreme Court of Appeal ngoLwesihlanu ekuseni njengoba ichithe isicelo sikaMengameli Jacob Zuma kanye ne-National Prosecuting Authority (NPA) sokudlulisa isinqumo seNkantolo eNkulu neyanquma ukuthi sibuyiselwe eceleni isinqumo sokuhoxiswa kwamacala angu-783 enkohlakalo ayebhekene noZuma.

UJaji Justice Lorimer Eric uchithe lesi sicelo nezindleko ngoLwesihlanu ekuseni.

UZuma kanye ne-NPA bafaka isicelo kule nkantolo sokudlulisa isinqumo se-North Gauteng High Court mayelana namacala enkohlakalo ayebhekene noMengameli Zuma.

Ngo-June 2016 i-North Gauteng High Court yachitha isicelo esasifakwe ngabameli baZuma kanye ne-NPA sokunikezwa igunya lokudlulisa isinqumo esathathwa yiyo le nkantolo ngenkathi inquma ukuthi kumele sibuyiselwe eceleni futhi sibuyekezwe isinqumo sokuhoxisa amacala enkohlakalo nokukhwabanisa ayebhekene noZuma.

FUNDA NALOLU DABA: UZuma akayogeza igama lakhe enkantolo uma emsulwa – Maimane

Ngo-April 2016 le Nkantolo eNkulu yasePitoli yanquma ukuthi sasingekho isizathu sokuthi kuhoxiswe amacala ayebhekene noZuma ngakho kumele sibuyiselwe eceleni futhi sibuyekezwe leso sinqumo.

“Isinqumo se-Supreme Court of Appeal namhlanje, yize siphoxile, besilindeleke kakhulu,” kusho iHhovisi likaMengameli esitatimendeni.

Leli hhovisi lithi lesi sinqumo senkantolo sisho ukuthi sekusemahlombe e-NPA ukuthi ithathe isinqumo sokuthi iyamshushisa yini uZuma.

Image: Commons Wikipedia

Related Posts