Kube nenkulu injabulo ezithunyweni ezingamalunga eqembu elibusayo eZimbabwe iZanu-PF kulandela isimemezelo sokuthi uMengameli Robert Mugabe usexoshiwe njengomholi weqembu.
Isinqumo sokuxoshwa kwakhe sithathwe yisigungu esiphezulu seqembu emhlanganweni obukhethekile ngeSonto.
FUNDA NALOLU DABA: I-Zanu-PF isimxoshile uMugabe njengoMengameli, noGrace akasindanga
Kubikwa ukuthi izifundazwe ezingu-10 zeqembu zithathe isinqumo sokuthi zimkhiphe esikhundleni uMugabe kulandela imibiko yokuthi usehlwithwe amandla okuhola izwe ngumbutho wezempi nokuthi useboshelwe endlini.
Kulo mhlangano kuphinde kwathathwa isinqumo sokuxosha nonkosikazi kaMugabe uGrace Mugabe njengomholi wophiko lwabesifazane lwe-Zanu-PF.
OwayiSekela likaMugabe u-Emmerson Dambudzo Mnangagwa, nobesanda kuxoshwa esikhundleni nguMugabe, useqokwe njengomholi wesikhashana weqembu kanti kulindeleke ukuba aqokwe njengoMengameli wezwe uma sekusule noma sekuketulwe uMugabe kwesokuba nguMengameli wezwe.
FUNDA NALOLU DABA: I-EFF igxeka iDA ngokuchitha umbono wokukhoseliswa kukaMugabe
Inqwaba yabaholi be-Zanu-PF, okubalwa kubo noGrace Mugabe, kulindeleke ukuba bashushiswe ngamacala ahlukene.
Manje uMugabe usenqunyelwe ugwayi katiki yi-Zanu-PF ukuthi asule njengomengameli wezwe, kungenjalo uzokhishwa ngevoti ePhalamende.
Imibiko ithi uMugabe ushaya phansi ngonyawo, uthi angeke ehle esikhundleni.
Robert #Mugabe has been dismissed as leader of the ruling ZANU-PF party in #Zimbabwe, Reuters sources say pic.twitter.com/ydLwFYxwjn
— Sky News (@SkyNews) November 19, 2017
WATCH: Members of Zanu-PF erupt in a massive cheer as the decision to recall President Mugabe is announced #Zimbabwe pic.twitter.com/I3t47QIiCt
— News24 (@News24) November 19, 2017
Image: Wikimedia Commons
